KK: ශ‍්‍රී ලාංකික රසිකයින්ගේ ද නොමඳ ආදරය දිනූ ගායකයා අභාවප‍්‍රාප්ත වෙයි

කලා

ඉන්දියාවේ සේම ශ‍්‍රී ලංකාවේ ද රසික ආදරය එක සේ දිනාගත් සංගීතඥ සහ ගායක KK, මැයි 31 අඟහරුවාදා රාත‍්‍රියේ සංගීත ප‍්‍රසංගයකට සහභාගී වී පැය කීපයක් තුළ දී අනපේක්ෂිත ලෙස අභාවප‍්‍රාප්ත විය.
ඕම් ශාන්ති ඕම් චිත‍්‍රපටයේ ශාන්ති ප‍්‍රියාගේ (දීපිකා පදුකෝන්) සලූ පොටෙහි සිය අත බැඳි පළඳනාව පැටලූනු ඕම් (ෂාහ් රුක් ඛාන්) ඇය පසුපසින් ඇදී යන දර්ශනය හා ගීය ඔබට මතක නම්, ඔබ KK ගැයූ ගීයක් අසා තිබේ.
පනස් තෙහැවිරිදි ණණගේ සත්‍ය නාමය ක‍්‍රිෂ්ණකුමාර් කුන්නත් වූ අතර, 1990ගණන්වල දී ඇරඹි වෘත්තීය දිවිය තුළ දී ඔහු ගයා ඇති ගීත සංඛ්‍යාව සිය ගණනකට අධික ය.
කල්කටාවේ ඔහු නවාතැන් ගෙන සිටි හෝටලයේ දී ඇදවැටී ඇති ඔහු වහා රෝහල කරා ගෙනගියත්, ඒ වන විටත් ඔහු ජීවිතක්ෂයට පත්ව ඇතැයි වෛද්‍යවරුන් තහවුරුකර තිබේ.
ඔහුගේ මරණයට හේතුව තවමත් අනාවරණය වී නැත.
KKගේ රසිකයින් සහ වෘත්තීය සගයින් මෙම පුවත ඔවුනට ඇතිකළ කම්පනය හා අවිශ්වාසය සටහන් කරද්දී, බදාදා උදෑසන ඉන්දියාවේ ට්විටර් ජාලය තුළ ‘Not KK‘ හෑෂ්ටැග් නම් එකක් ටෙ‍්‍රන්ඞ් විය.
ඔහුගේ ශ‍්‍රී ලාංකික රසිකයින් ද ෆෙස්බුක් ආදී සමාජ මාධ්‍යයන්හි සිය ශෝකය පළකරමින් සිටියි.
ඉන්දීය අගමැති නරේන්ද්‍ර මෝදි ද ගායකයාගේ ”අකල් මරණය” ගැන ට්විටර් පණිවුඩයක් නිකුත් කරමින් සිය ශෝකය ප‍්‍රකාශ කළේ ය.
”ඔහුගේ ගීත පුළුල් පරාසයක හැඟීම් පිළිබිඹු කළා වාගේම, සෑම වයස් කාණ්ඩයකම මිනිසුන්ගේ හදවත්වලට තදින්ම කාවැදී තිබුණා. අපට ඔහුගේ ගීත හරහා ඔහු සදාකාලිකව මතක තිබේවි,” මෝදි වැඩිදුරටත් සඳහන් කළේ ය.
පන්ජාබි රැුප් ගායක සිධූ මූස් වාලා ඝාතනයවීමෙන් දෙදිනකට පසු KKගේ මරණය සිදුවීම, සතියක් තුළ ඉන්දීය සංගීත ලෝලීන්ට පිටපිට එල්ලවූ දෙවැනි පහර විය.
1968 දී දිල්ලියේ උපන් KK සිය ගායන දිවිය ආරම්භ කළේ වෙළඳ දැන්වීම්වලට පසුබිම් ගීත ගැයුමෙනි. ඔහු සිනමා සංගීතයට ඇතුළුවීමේ භාග්‍යය උදාකර ගැනීමට පෙර එවැනි පසුබිම් ගී 3500කට වඩා ගායනාකර තිබුණි.
KK දෙමළ, තෙළිගු, කන්නඩ වැනි ඉන්දීය භාෂා රැුසකින් ගී ගැයීය. නමුත් ඔහුගේ ජනප‍්‍රියතම ගීත වන්නේ ඔහු හින්දි භාෂාවෙන් ගැයූ ඒවා වන අතර, ඉන් රැුසක් බොලිවුඞ් චිත‍්‍රපට සඳහා භාවිතා විය.
තු හි මෙරි ශබ් හේ (ගැන්ග්ස්ටර්), ආකෝන් මේ තෙරී ( ඕම් ශාන්ති ඕම්*, කුදා ජානේ (බච්නා ඒ හසීනෝ), සරා සා (ජන්නත්), තඩප් තඩප් (හම් දිල් කේ චුකේ සනම්), ක්‍යා මුජේ ප්‍යාර හේ (වෝ ලම්හේ), දස් බහානේ (දස්) වැනි ප‍්‍රසිද්ධ හින්දි ගීත රාශියක් ද ඔහු විසින් ගැයුණු ගීත වේ.
ඔහු බොහෝදෙනාගේ ආදරයට ලක්වන ඉන්දි-පොප් (ඉන්දියානු පොප්) ගීත කිහිපයක් ද ගායනා කළ අතර, ‘පල්‘ (මොහොත) සහ ‘යාරෝ‘ (මිතුරන්වැනි) ගී ඒ අතර විය.
ඉන්දියානු සංගීත ක්ෂේත‍්‍රයේ ඔහුගේ වෘත්තීය සගයන් බොහෝදෙනෙක්, ඔහු සමග වූ ඔවුන්ගේ ඇසුර සිහිපත් කළහ.

ප්‍රතිචාරයක් ලබාදෙන්න

ඔබගේ ඊමේල් ලිපිනය ප්‍රසිද්ධ කරන්නේ නැත.