ඇමෙරිකන් ජනාධිපති ජෝ බයිඩන් ඇතුළු ඇමෙරිකන් රජයේ ඉහළ නිලධාරීන්ට පමණක් නොව, කැනඩා අග්‍රාමාත්‍ය ජස්ටින් ටෘඩෝ ඇතුළු කැනඩා රජයේ ඉහළ නිලධාරීන්ට ද රුසියාව සම්බාධක පැනැවීම් සිදු කර ඇත.
සම්බාධක පැනැවීම් සිදු කර ඇත්තේ රුසියන් ජනාධිපතිවරයාගේ තීරණයක් අනුව යැයි පැවැසෙයි. ඒ, එකට එක කිරීමක ලෙසය.
මේ වනවිට ඇමෙරිකාව, කැනඩාව පමණක් නොව, බටහිර රටවල් සහ බටහිර නොවන රටවල් ද රුසියාවට එරෙහිව දැඩි සම්බාධක රැසක් පනවා තිබේ. ඒ, රුසියානු ජනාධිපති පුටින් යුක්රේනය ආක්‍රමණය කිරීමට විරෝධය පළ කරමින්ය.
එම සම්බාධක අනුව, රුසියන් ජනාධිපති ව්ලැදිමීර් පුටින්ට හෝ සම්බාධක පැනැවූ සෙසු රුසියන් රජයේ නිලධාරීන්ට හෝ රුසියාවේ සිට වෙනත් විදේශයකට යෑමට නොහැකි වෙයි.
රුසියන් ජනාධිපති පුටින් සම්බාධක පැනැවූ පුද්ගලයන් අතර ඇමෙරිකන් ආරක්ෂක ලේකම් ලොයිඩ් ඔස්ටින්, සී.අයි.ඒ. ප්‍රධානී විලියම් බර්න්ස් සහ ජාතික ආරක්ෂක උපදේශක ජේක් සුලිවාන් ද සිටින බව පැවැසෙයි. රුසියාව පෙරළා පැනැවූ සම්බාධක අනුව, මොවුන් කිසිවකුට රුසියාවට පැමිණීමට නොහැකි වනු ඇත.
(රොයිටර්)
